Moompi is ‘n skaam, blou, vriendelik karaktertjie wat baie lief is vir alle kinders. Moompi help hulle om veilig en gesond te kan grootword. Die konsep is in 1995 deur die Greater Tshwane Child Protection Initiative ontwikkel om te help met die identifisering en behandeling van kindermishandeling.

Laerskool Hendrik Louw gebruik Moompi om te fokus op die ontwikkeling van verantwoordelike gedrag by ons kinders en die voorkoming van mishandeling. Moompi dra ook by tot die daarstel van ‘n veilige en gesonde omgewing vir ons kinders om in te kan ontwikkel en groei.

Daar is ‘n vrywillige, opgeleide mamma aan elke graad toegewys wat fokus daarop om spontane kommunikasie te fasiliteer en aan te moedig by ons kinders. Kinders kan ‘n briefie aan Moompi skryf waarin hy/sy emosies met Moompi deel en dit dan pos in die spesiale Moompi-posbus by die skool. Die kind mag ook versoek om met die mamma te gesels. Elke oggend tydens die eerste 45 minute van die skooltyd, is daar ‘n Moompi-tannie aan diens in die Moompi-hoekie. Hier word ‘n veilige omgewing geskep waarbinne die kind sy goeie en slegte emosies kan deel en gehelp word om dit te hanteer.

Verwysings word gedoen na die onderskeie departmentshoofde vir verdere aandag, indien nodig. Moompi hanteer ongeveer 120 briewe en 90 persoonlike gesprekke elke kwartaal.