LAERSKOOL HENDRIK LOUW

Laerskool Hendrik Louw – Uitnemendheid sedert 1880

Welkom by Laerskool Hendrik Louw. Dit is die skool by die see en ons noem onsself graag “Die beste skool suid van die Noordpool”.

Laerskool Hendrik Louw is ‘n multi-kulturele skool waar kinders grootgemaak en opgevoed word binne die ware weerspieëling van die Suid-Afrikaanse samelewing. Met dit in gedagte, speel diversiteit en lewensvaardighede ‘n beduidende rol in die holistiese ontwikkeling van elke unieke individu. Ons fokus op uitnemendheid op alle vlakke van die lewe en daarom vestig ons die waardes van betroubaarheid, respek, verantwoordelikheid, regverdigheid, omgee en goeie burgerskap in die alledaagse lewe van elke leerder.

Ons is absoluut verheug dat 1200 leerders en hul ouers Laerskool Hendrik Louw gekies het om hul opvoedkundige reis aan te pak. Ons bly die skool wat ‘n beduidende leier in onderwys is, veral deur ons uitstekende akademiese program wat deur uitstekende onderwysers en onderwysleiers bestuur word. Hierdie skool was, is en sal altyd aan die voorpunt van verandering en ontwikkeling in die moderne era van onderwys wees.

Vanaf 2023 volg ons ‘n geïntegreerde program, wat ons Mariene Studies en Volhoubaarheid noem. Ons fokus op die onderrig van mariene bewaring en hoe om hernubare en alternatiewe hulpbronne te benut om ‘n beter toekoms vir ons almal te skep. Vanjaar is ook die eerste jaar waarin ons die program genaamd Development of Mobility and Skills (DMS) implementeer ten einde fyn en groot motoriese vaardighede sowel as die fisiese kondisionering en vaardigheidsontwikkeling van ons leerders te verbeter. Dit sal akademiese uitslae, sowel as sportuitslae verbeter. Ons is ook trots om aan te noem dat ons heelwat tydgleuwe in die rooster vir kulturele ontwikkeling toegeken het. Daar is ‘n kultuur-uur op ‘n Vrydag asook ‘n kuns-uur per week vir elke klas. Ons Inligting- en Tegnologie-afdeling funksioneer optimaal en skep talle voordele vir ons leerders. Robotika en kodering brei ook vinnig uit, veral in ons Grondslagfase.

Die skool bied talle buitemuurse aktiwiteite vir ons leerders aan en ons gebruik slegs die beste afrigters om ons leerders as deelnemers te vorm. Ons het vanjaar begin met branderplankry (surfing) as ‘n skoolsport. Dit is ‘n uitstekende metode om leerders aan die see bekend te stel en hulle van seeveiligheid te leer terwyl hulle hope genot ervaar.

Ons leerders is gelukkig, veilig en opgewonde om elke dag nuwe leergeleenthede aan te pak. Hulle word versorg deur briljante onderwysers wat in uitnemendheid glo, wat met empatie optree en wat met passie en toewyding onderrig gee. Dit kan ervaar word in ons visie wat lui: “Altyd ons beste vir elke kind.”

Laerskool Hendrik Louw dien die gemeenskap van Strand met trots en hier skep en handhaaf ons die intellektuele, persoonlike, emosionele en geestelike welstand van elke leerder en onderwyser.

BE THE BEST. LET’S DO IT!

Jacques Horne
Skoolhoof