Laerskool Hendrik Louw

ALTYD ONS ALLERBESTE VIR ELKE KIND

LAERSKOOL HENDRIK LOUW

Ons Geskiedenis

Van die begin af...
Verkenning van die toekoms vereis kennis van die verlede.

Enige persoon wat die verloop van gebeure en die vroeë geskiedenis van ‘n instelling wil naspoor en opteken, bereik soms ‘n stadium waar dit moeilik – indien nie byna onmoontlik is – om vas te stel wat presies gebeur het.

Onderwys in Somerset-Wes Strand – ‘n dorpie aan die einde van ‘n sanderige kronkelpad wat Somerset-Wes met Valsbaai verbind het – was geen uitsondering nie.

Ons weet nie wanneer ouers van hierdie klein gemeenskap besluit het om hul skoolbande met bestaande kerkskole in Somerset-Wes te verbreek nie.

Dit word aangeneem dat die paar Strand-kinders voor die vyftigerjare van die vorige eeu, die privaatskole in die omgewing bygewoon het. Een van die naaste was dié van die Morkels by Morgenster en Onverwacht, nou bekend as Die Bos.

Meer Oor Ons

Ons Missie

Om ‘n gebalanseerde waardegedrewe leeromgewing te skep waarbinne opvoeders en ouers kan saamwerk om die volle potensiaal van elke kind te ontwikkel.

Ons Visie

Altyd ons allerbeste vir elke kind.

Ons Waardes

  • Betroubaarheid
  • Respek
  • Verantwoordelikheid
  • Omgee
  • Regverdigheid
  • Goeie burgerskap

Ons Fasiliteite

Beheerliggaam

Saam vir ons kinders

Soos jy, is ek ook ‘n ouer van Laerskool Hendrik Louw. Ek word gereeld gevra oor Hendrik Louw. My antwoord is eenvoudig: “Ek weet dat hulle die beginsels en waardes ondersteun wat my kinders sal toerus om in gebalanseerde en afgeronde jong seuns en dogters te ontwikkel.”

Teen hierdie tyd weet jy reeds dat die waardes van respek, omgee, verantwoordelikheid, goeie burgerskap, regverdigheid en betroubaarheid elke dag aan ons kinders gebied word. Trouens, jy sou dit opgemerk het teen die mure van ons skool waar dit deur mede-ouers in ‘n pragtige mosaïek aangebring is vir elke kind, ouer en opvoeder om te sien.

Elke opvoeder het, soos jy, ‘n hart vir ons kinders en leef elke dag hierdie waardes uit. As ouer is dit ‘n groot voorreg om ons kinders se opvoeding met opvoeders van hierdie kaliber op te bou en ‘n skool te skep waar elke kind sy talente en potensiaal kan ontwikkel.

Dit gaan egter oor meer as net opvoeding en kennis. Dit gaan oor ‘n gemeenskap. Daarom leer projekte soos Moompi, kinders dat daar altyd ‘n plek of persoon is waarheen hulle kan gaan as daar iets is waarmee hulle sukkel. Ons leef in ‘n wêreld van uitdagings. Ons as ouers kan nie altyd ons kinders beskerm nie. Soms kan ons hulle net toerus om hulself te handhaaf. Ons kinders weet dat hulle altyd na die skool se Moompi-tannie kan gaan of ‘n brief kan skryf.

As ouer het ek altyd gewonder hoe ek kan bydra tot ‘n skool wat ek graag wil hê my kinders moet bywoon. Wil ek altyd net ‘n toeskouer of kritikus wees? Of is daar ‘n manier waarop ons ‘n verskil kan maak?

Daar is gesê: “Die enigste ding wat nodig is vir die oorwinning van boosheid, is dat goeie mense niks doen nie” (Edmund Burke). Ons het baie goeie ouers en baie van hulle is bereid om betrokke te raak. Ons Ouer-Onderwysersvereniging (OOV), waar ons hardwerkende en toegewyde ouers het wat saam met ons opvoeders werk om net die beste vir ons kinders te bied, is ’n manier vir ouers ombetrokke te raak.

Sedertdien het ons baie projekte gehad wat hierdie ouers en opvoeders suksesvol afgehandel het. Daar is soveel talentvolle ouers daar buite, met vaardighede wat selfs nog meer kan bydra tot ons kinders. Ek versoek u om vir ons kinders se onthalwe betrokke te raak. Bied jou vaardighede en tyd aan. Die beloning sal op jou kind se gesig geskryf staan.

Uiteindelik wil ek alle ouers en opvoeders nooi om die voorbeeld vir ons kinders te stel om die waardes van respek, omgee, verantwoordelikheid, goeie burgerskap, regverdigheid en betroubaarheid uit te leef. Of ons dit langs die sportvelde, by skoolfunksies, of by die huis doen, kinders sal ons voorbeeld volg. Kom ons doen ons beste saam vir ons kinders.

Met vriendelike groete

Pieter Rossouw
Voorsitter, Beheerliggaam.